Advertisements
Skip to content

ئایار 2, 2018

کچە کاندیدی پارتی هێشو ڕێبوار وەڵامی سەرۆکی زانکۆ دەداتەوە کە بەڵگەی دکتۆرنەبوین خستە بەرچاوی میدیاکان

by Kurd

ماڵپەری ئاوێنە راپۆرتێکی لەسەر دکتۆر نەبوونی کچە کاندیدی پارتی هێشوو رێبوار بڵاوکردۆتەوە کە تێیدا وەڵامی خانمە کاندیدەکەی پارتیشی تێدایە :

دەقی راپۆرتەکە:

زانكۆی پۆلیتەكنیكی سلێمانی لە رونكردنەوەیەكدا بۆ كۆمسیۆن رایدەگەیەنێت كە هێشو رێبوار عەلی، كاندیدی ژمارە 13ی پارتی لە سلێمانی هەڵگری بڕوانامەی دكتۆرا نییە لەكاتێكدا بەو جۆرە خۆی دەناسێنێت. لەبەرامبەردا كاندیدەكەی پارتی دەڵێت ئەو رونكردنەوەیە بەمەبەستی “لێدان لەكەسایەتیم” دراوەتە كۆمسیۆن.

ئاوێنە: ئالان فەرەیدون، سەرۆكی زانكۆی پۆلیتەكنیكی سلێمانی لە رونكردنەوەیەكدا كە دوێنێ(دوشەممە) ئاڕاستەی ئۆفیسی سلێمانی كۆمسیۆنی باڵای سەربەخۆی هەڵبژاردنەكانی كردوە و وێنەیەكی دەست ئاوێنە كەوتوە، رایگەیاندوە هێشو رێبوار عەلی كاندیدی پارتی دیموكراتی كوردستان لەسلێمانی وەك دكتۆرە واتە هەڵگری بڕوانامەی دكتۆرا ئەناسێنێت و بانگەشەی بەدەستهێنانی ئەو بڕوانامەیە دەكات. بەڵام ناوبراو كەمتر لە شەش مانگە دەستی بە خوێندنی دكتۆرا كردوەو بەهیچ شێوەیەك هەڵگری بڕوانامەی دكتۆرا نییە.

وتوشیەتی”لەڕوانگەی هەستكردنی بە بەرپرسیارێتیمان بەرامبەر بە زانست و فێركردن ئەو رونكردنەوەیە بۆ بەڕێزتان دەنێرین تاوەكو چیتر خەڵكی كوردستان بەگشتی و بەتایبەتی شاری سلێمانی فریونەدرێن لەلایەن ناوبراوەوە و چەواشەكاری نەكات بەپێشگری دكتۆرە لەكاتێكدا دكتۆرە نییە.

داواشی كردوە كە كاری یاسایی لەسەر ئەو كەیسە بكرێت.

لەبەرامبەر ئەوەدا كاندیدەكەی پارتی دیموكراتی كوردستان، هێشو رێبوار عەلی (ڕۆژی سێشەممە) لە راگەیەندراوێكدا كە وێنەیەكی دەست ئاوێنە كەوتوە، هێرشی توندی كردۆتەوە سەر سەرۆكی زانكۆكەو وتویەتی”وەک ئاشکرایە جەنابت بەمەبەستی لێدان لە کەسایەتیم ڕونکردنەوەیەکتان داوە بە کۆمیسیۆن.”

ئەوەشی وتوە”من لێرەدا سەرباری سەرنج و بۆ چونم لەسەر مەبەستی ناوەڕۆکی ڕونکردنەوەکەت پێم باشە تەنھا لێت بپرسم کە ئەوەندە خەمخۆری زانستیت بۆچی لەسنوری زانکۆکەتدا چەندین کەسی نەشیاو لەپۆست و پایەدان و چەندین ساڵە بە ویست و ئیرادەی ئەوان زانکۆ و پەیمانگاکانت بەڕێوەدەچن، ئایا ئەوانە نازناوی زانستیان ھەیە جەنابی خەمخۆری زانست؟”

ئەوەشی خستۆتەڕو”کەسانێک کارەکانت بەڕێوەدەبەن ئیستا لە خوێندنن و لە پۆستی باڵادان و خاوەن بڕیارن لای جەنابی خەمخۆرت، تەنانەت ناتوانیت یەک وشەیان ڕەتبکەیتەوە.”

هێشو سەرۆكی زانكۆی پۆلیتەكنیكی سلێمانی تۆمەتبار كردوە بەوەی كە بە مەحسوبیەت لەو پۆستەدایەو جگە لە “گوێڕایەڵی” بۆ حزب، “هیچی بە رەوشی زانست نەبەخشیوە.”

لەكۆتاییشدا وتویەتی”ئەگەر من کاندیدی حزبەکەی خۆت بومایە ھەر ھەڵوێستت بەم شیوەیە ئەبو؟”

Advertisements
Read more from هەواڵ

کؤمینتت چیە؟

%d هاوشێوەی ئەم بلۆگەرانە: