بۆ تاقیکردنەوەکان وەزارەتی پەروەردە ئامێری پووچەڵکردنەوەی قۆپییە بەکاردەهێنێت

وتەبێژی بەڕێوەبەرایەتی گشتی پەروەردەی سلێمانی رایدەگەیەنێت، ئەمساڵ بۆ تاقیکردنەوە وزارییەکان وەزارەتی پەروەردە ئامێری پووچەڵکردنەوەی قۆپییە بەکاردەهێنرێت، کە  لە ناوەراستی هۆڵەکاندا بەبەرزی مەترێک و ٦٠ سانتیمەتر دادەنرێت و سەرجەم هێڵەکانی مۆبایل پووچەڵدەکاتەوە.

مەریوان عومەر، بە خەندان-ی راگەیاند، تاقیکردنەوەکان هەر رۆژ نارۆژێك ئەنجامدەدرێت، یەک شەممە و سێ شەممە و پێنجشەممە پۆلی ١٢-کان تاقیکردنەوە ئەنجامدەدەن، رۆژانی شەممە و دووشەممە و چوارشەممەش پۆلی نۆکان تاقیکردنەوە ئەنجام دەدەن جگە لە ئەمڕۆ.

دەشڵێت، سەرجەم هۆڵەکان بەڕێوەبەر و چاودێری هۆڵ و سەرجەم پێداویستییەکانیان بۆ دابینکراوە، هێڵێ ئینتەرنێتیش کار ناکات و هێزەکانی پۆلیسیش بۆ ئاسایش و پاراستن و چاودێریکردنی هۆڵەکان دابینکراوە.

لە سنووری پارێزگای سلێمانی سلێمانی٣٢ هەزارو ٨٧٥ خوێندکار بەشداری تاقیکردنەوەکانی پۆلی نۆی بنەڕەتی دەکەن، لە ٦٧١ هۆڵدا، کە هەشت هۆڵیان بۆ خوێندنی ئیسلامییە، هەروەها ٣٦ هەزار و ٧٤٩ خوێندکار بەشداری تاقیکردنەوەکانی پۆلی ١٢ ئامادەیی دەکەن لە ٦٢٥ هۆڵدا.

 

Advertisements

comments?